زموږ د هيواد د دردوونكو پېښو او د بې ګناه زخمي زړونو د فريادونو په ورځ شمېرنه كې، د تورمخو او سړي وژونكو(طالبانو) دښمني او سخت زړيتوب ښكاره څرګند دى او د وحشي او رټل شويو ترهګرو مزدورانو پر تندي به د مظلومو او بېګناه انسانانو د وينو ټاپې تر قيامته پورې پاتې وي.

پر لبناني رسټورانټ باندې د ځانمرګي بريد له امله د سلګونو وطنوالو شهادت او ټپي كيدل، د غازي اباد په ولسوالۍ كې د ملي اردو د سرحدي ساتونكو پر پوستو د سلګونو وسله والو بريد، د ميمنې په ښار كې ځانمرګى بريد، د جلال اباد ښار د پوليسو د ادارې پر ودانۍ ځانمرګى بريد، په كندهار او غزني ولايتونو كې ځانمرګي بريدونه او تر ټولو وحشتناك بريد په سرينا هوټل كې د نوي كال پر خوشالي كوونكو باندې، چې د سردار احمد او د هغه د مظلومې كورنۍ پر شهادت پاى ته ورسيد، د سيمې د بشپړتيا غوښتونكو او ځورونكو استخباراتي كړيو او د هغوى د نامسلمانو مزدورانو د نا اعلان شوې جګړې نښې دي، چې زموږ د ملت خپلواكي او سوكالي نه شي زغملاى.

د افغانستان د اسلامي جمهوريت د ملي شورا ولسي جرګه دغه ډول جنايتكاره بريدونه په سختو ټكو غندي او د دوو ماشومانو هر يوه نيلوفر او عمر په ګډون د سردار احمد او د هغه د ميرمنې شهادت، د ولسي جرګې د غړي ښاغلي حبيب افغان ټپي كيدل او د ولسي جرګې پر بل غړي ښاغلي جناب صاحب بريد د ټولو انساني اصولو خلاف ناوړه كړنه بولي ددې ناوړه جنايت د غندنې تر څنګ، د افغانستان له سوله پال او زړور ملت څخه غواړي، چې د خپل دردونكي برخليك د بدلون په موخه د خپلو زړورو او وطندوستو امنيتي ځواكونو ترڅنګ د دښمن پر وړاندې له هيڅ ډول همكارۍ او سرښندنې څخه ډډه ونه كړي.

د افغانستان د اسلامي جمهوريت د ملي شورا ولسي جرګه له حكومت څخه غواړي ترڅو په مسوولانه ځواب او د روښانه سياست په اعلامولو سره د افغانستان د دښمنانو پر وړاندې د امنيت په تامينولو او اغيزمنو تدبيرونو په ترسره كولو د خپل اجراييوي مسووليت له مخې جدي پاملرنه او پلټنې وكړي. يوازې په غندلو او د تسليت او خفګان په پيغامونو بسنه ونه كړي، جدي او عملي حل لارې ورته وړاندې كړي، چې وكولى شي ددې هيواد د بې ګناه بچيانو د وژلو او قرباني كيدو مخه ونيسي او د دا ډول وحشيانه بريدونو عاملين او تنظيمونكي وپيژني او په ډاګه يې كړي او د قانون منګولو ته يې وسپاري. تر څو د دوى د مسووليت د دورې په پاى كې د هيواد د راتلونكي تاريخ پر وړاندې د قضاوت د سترګو شنه پاڼه خلاصه شي.

ومن الله توفيق

د افغانستان د ملي شورا ولسي جرګه