د مرغومې ۲۹مه، ۱۳۹۴کال
د
ولسي جرګې کمیسیونونو د بیلابیلو موضوعاتو
په اړه غونډې وکړې.
د مواصلاتو او مخابراتو کمیسیون په غونډه کې، چې د قیس حسن په
ریاست جوړه شوې وه، پکې د ۱۹۸۳ کال د استراسبورک د محکومینو د لیږد کنوانسیون په
اړه بحث وشو، د کمیسیون غړو یاد کنوانیسیون دهیواد په ګټه وباله او د رایو په
اکثریت یې تایید کړ.
د غونډې په پای کې کمیسیون ته راغلې عرض پانې وڅیړل شوې
او د لازمو اجراآتو لپاره اړوندو مراجعو ته واستول شوې.
د شهیدانو او معلولینو دچارو کمیسیون په غونډه کې، چې د استاد محمد اکبري په ریاست جوړه شوې وه، پکې له
اجندا سره سم د افغانستان او عربي متحدو اماراتو تر منځ د همکاریو دمشارکت تړون
وڅیړل شو. دغه تړون روان کال د مرغومې په ۲۴مه
نیټه په دوبۍ کې، عربي متحده اماراتو ته د ولسمشر د امنیتي سلاکار حنیف
اتمر د سفر په ترڅ کې لاسلیک شوی او د تصویب لپاره ملي شورا ته استول شوی دی. یاد
هوکړه لیک په سیاسي، ټولنیز، فرهنګي، ښې حکومتولۍ، د قانون حاکمیت او اقتصاد په
برخو کې چمتو شوی دی. د کمیسیون غړو دغه هوکړه لیک د هیواد په ګټه وباله او تایید
کړ.
ورپسې د بغلان ولایت دمعلولینو د کلتوري او پراختیایي
بنسټ د غړو پیشنهادات وڅیړل شول. دوی وایي چې د دې بنسټ له جوړیدو راهیسې پر دې
توانیدلي چې معلولینو ته کار پیدا کړي. دوی دغه راز د بغلان ولایت د معلولینو د وضعیت ښه کیدوپه
خاطر له دې بنسټ سره د مرستې کولو غوښتنه وکړه.
د نشه یي توکو پر ضد دمبارزې کمیسیون غونډه، د خدا داد عرفاني په ریاست تر سره شوه.
په غونډه کې د هیواد امنیتي وضعیت په اړه بحث وشو او د
هیواد په بېلابېلو برخو په ځانګړي توګه ننګرهار ولایت کې وروستي ځانمرګي بریدونه
وغندل او هغه یې د سولې او امنیت د دښمنانو کار وباله او د پیښې شهیدانو ته د
فردوس جنت او ټپیانو ته د عاجلې روغتیا غوښتنه وشوه.
همدارنګه دکمیسیون غړو په کابل کې د سولې په تړاو څلور
اړخیزې غونډې څخه ملاتړ وکړ او هیله مندي یې وښوده چې دغه ناستې د دولت وسله والو
مخالفینو سره د سولې او پخلاینې لامل شي. د کمیسیون په غونډه کې دغه راز د ملي
شورا د پنځه څلویښت ورځنیو رخصتیو په اړه خبرې وشوې او ټینګار وشو چې په دغې موده
کې دې د ولس استازي خپلو اړوندو ولایتونو، ولسوالیو او کلیو ته سفرونه وکړي او
خپلو خلکو ستونزې دې له نږدې وګوري او د حلولو په موخه دې له سیمه ییزو چارواکو سره
خبرې وکړي.
دغه راز د کمیسیون غړیو د کورنیو چارو او ملي دفاع
وزارتونو او د ملي امنیت عمومي ریاست او د سیمه ییزو ارګانونو خپلواکې ادارې څخه
وغوښتل چې د ولایتونو سیمه ییزو چارواکو ته لارښوونه وکړي، چې د رخصتۍ په موده کې
په ولایتونو کې د وکیلانو امنیت ته جدي پام وکړي.
د غونډې په پای کې کمیسیون ته راغلې عرض پانې وڅیړل شوې
او د لازمو اجراآتو لپاره اړوندو مراجعو ته واستول شوې.
ژباړن: کامران ابراهیمي